Col 4 | BOJ | STEP | O wau qa gate, niŋgi dego nuŋgo kaŋgal tamo naŋgi kumbra bole enjroqniye. Niŋgi qalie, nuŋgo Gate dego unu. Agi a laŋ goge di unu.

Colossians 4

1 O wau qa gate, niŋgi dego nuŋgo kaŋgal tamo naŋgi kumbra bole enjroqniye. Niŋgi qalie, nuŋgo Gate dego unu. Agi a laŋ goge di unu.

Niŋgi gaigai siŋgila na Qotei pailyoqniye

2 Ariya was qu, niŋgi gaigai siŋgila na Qotei pailyoqniye. Niŋgi aqar ataib. Niŋgi pailyoqnsib geregere are qaloqnsib Qotei biŋiyoqniye. 3 Niŋgi iga qa dego Qotei pailyoqniye. Niŋgi endegsib pailyoqniye, “O Abu, ni na Pol aqa wau qujai naŋgi ti gam waqtetnjroqnimqa naŋgi medabu waqtoqnsib Kristus aqa anjam nami uliesoqnej qaji di marsib laqnqab.” O was qu, jeu tamo naŋgi Kristus aqa anjam di quqwa asginjreqnu deqa naŋgi e ojsib tonto talq endia waibeb unum. 4 Deqa niŋgi e qa endegsib Qotei pailyoqniye, “O Abu, ni na Pol aqa medabu siŋgilatetimqa a Qotei aqa areqalo dauryoqnsim Kristus aqa anjam geregere palontoqnqas.”

5 Niŋgi tamo Yesus qaliesai qaji naŋgo ambleq di sosibqa niŋgi areqalo bole dauryoqnsib kumbra bole bole yoqniye. Osib bati gaigai Kristus aqa kumbra naŋgi osornjrqajqa are qaloqniye. 6 Niŋgi anjam bole segi gaigai maroqniye. Yim nuŋgo anjam dena tamo naŋgo are siŋgilatetnjroqnqas. Tamo naŋgi na niŋgi anjam bei nenemŋgibqa niŋgi kamba anjam bei minjrqa oqnsib geregere are qaloqnsib minjroqniye.

Pol a Tikikus wo Onesimus wo qariŋnjrnaq naŋgi Kolosi naŋgi qa gileb

7 E na Tikikus qariŋyonum niŋgi qa bqo. A ijo wau kalil qa niŋgi saiŋgwas. Tikikus a gago wau qujai. A gago Kristen was bole. A Tamo Koba Yesus aqa wau tamo bolequja. 8 E na a qariŋyonum niŋgi qa bqo. Di kiyaqa? Iga kiersi unum di a na niŋgi saiŋgim niŋgi qusib dena nuŋgo are siŋgilatqab. 9 E na Onesimus dego qariŋyonum a Tikikus ombla na niŋgi qa bonub. A dego gago Kristen was bole. A nuŋgo leŋ. Naŋgi aiyel niŋgi qa bosib gago kumbra kalil qa niŋgi saiŋgwab.

Pol a na Kolosi naŋgi kaiyeinjrej

10 Aqo Aristarkus wo ombla na tonto talq endi waigeb unum. A na niŋgi kaiyeiŋgwo. Mak a Barnabas aqa gagai. A dego niŋgi kaiyeiŋgwo. Mak a niŋgi qa bo degamqa niŋgi a osib gerege-reiyiye. Agi e nami a qa anjam neŋgreŋyosim niŋgi qa qariŋyem. 11 Jastus a na dego niŋgi kaiyeiŋgwo. Aqa ñam bei Yesus. A Yesus aqa wa. Naŋgi qalub Juda tamo. Juda tamo qudei naŋgi e ombla wauosaieqnub. Naŋgi segi qalub e ombla na waueqnum. Qotei a gago Mandor Koba sosiq iga taqatgeqnu anjam di naŋgi segi qalub e aqaryaiboqnsib marsib laqnub.

12 Epafras a na dego niŋgi kaiyeiŋgwo. A nuŋgo leŋ. A Kristus Yesus aqa wau tamo. A gaigai siŋgila na niŋgi qa endegsi Qotei pailyeqnu, “O Abu, ni na Kolosi Kristen naŋgi aqaryainjrimqa naŋgi siŋgila na tigeloqnsib naŋgi Kristen tamo tulaŋ boledamu sosib ino kumbra bole keretosib ino areqalo kalil geregere qalieqab.” 13 O was qu, e niŋgi endegsi merŋgwai. Epafras a gaigai niŋgi qa are qaloqnsiq deqa a wau koba yeqnu. Niŋgi qa ti Laodisia qure qaji naŋgi qa ti Hierapolis qure qaji naŋgi qa ti are qaloqnsiq deqa wau koba yeqnu. 14 Ariya Luk a dego niŋgi kaiyeiŋgwo. A ma gereiyo qaji tamo. Iga a tulaŋ qalaqalaiyeqnum. Demas a dego niŋgi kaiyeiŋgwo.

15 O was qu, niŋgi na ijo kaiye anjam endi osib Kristen tamo uŋgasari Laodisia qureq di unub qaji naŋgi dego kaiyeinjriye. Osib Kristen tamo uŋgasari Nimfa aqa talq di korooqnsib loueqnub qaji naŋgi ti ijo kaiye anjam endi osib naŋgi minjriye. 16 Niŋgi na ijo anjam kalil e na neŋgreŋyonum qaji endi sisiyosib koboamqa qariŋyib Laodisia Kristen naŋgi qa gilimqa naŋgi dego sisiyqab. E anjam bei dego nami neŋgreŋyosim Laodisia Kristen naŋgi qa qariŋyem. Ijo anjam di naŋgi na kamba olo niŋgi qa qariŋyib niŋgi dego sisiyoiye. 17 Ariya niŋgi na Arkipus endegsib minjiye, “Qotei a na ni wau emqo deqa wau di ni na taqatosim geregere wauoqne.”

18 E Pol. Ijo anjam bosiq endi koboqo. Deqa e ijo segi baŋ na kaiye anjam endi neŋgreŋyosim niŋgi qa qariŋyonum. E tonto talq endi unum deqa niŋgi e uratbaib. Niŋgi e qa are qalsib soqniye. O was qu, Qotei a niŋgi qa are boleiyeme.